ຂ່າວດີ! ເສັ້ນທາງຄອນກຣີດ ອ້ອມດອນໂຂງ ເລີ່ມລົງມືກໍ່ສ້າງແລ້ວ ມີຄວາມຍາວ 43 ກິໂລແມັດ

1 min


0
201 shares

ບໍລິສັດ ຮ່ວມພັດທະນາ ສີທັນດອນ ຈຳກັດ ເຊິ່ງເປັນຜູ້ລົງທຶນພັດທະນາເຂດເສດຖະກິດໃໝ່ ສີທັນດອນ ເມືອງໂຂງ ແຂວງຈຳປາສັກ ໄດ້ໃຫ້ການຊ່ວຍເຫຼືອລ້າໃນການກໍ່ສ້າງເສັ້ນທາງຄອນກຣີດອ້ອມດອນໂຂງ ທີ່ມີຄວາມຍາວ 43 ກິໂລແມັດ ດ້ວຍມູນຄ່າການລົງທຶນ 25 ລ້ານໂດລາ ແລະ ຄາດວ່າຈະໃຫ້ສໍາເລັດໃນປີ 2020 ເພື່ອອໍານວຍຄວາມສະດວກແກ່ການສັນຈອນໄປ – ມາ, ທັງເປັນການສົ່ງເສີມການທ່ອງທ່ຽວ ແລະ ຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນກວ່າເກົ່າ. ຂະນະທີ່ຄວາມຄືບໜ້າຂອງໂຄງການພັດທະນາເຂດເສດຖະກິດໃໝ່ ສີທັນດອນ ແມ່ນມີຫຼາຍໜ້າວຽກສຳເລັດຕາມແຜນການ.

ທ່ານ ເຈິ້ງ ກວາງ ຝ້າຍ ( Cheng Keung Fai ) ປະທານ ບໍລິສັດ ຮ່ວມພັດທະນາ ສີທັນດອນ ຈຳກັດ ກ່າວໃນພິທີວາງສີລາລືກ ວ່າ: ການຊ່ວຍເຫຼືອລ້າກໍ່ສ້າງເສັ້ນທາງຄອນກຣີດອ້ອມດອນໂຂງ ມີຄວາມຍາວທັງໝົດ 43 ກິໂລແມັດ, ກວ້າງ 6 ແມັດ ເປັນພຽງການເລີ່ມຕົ້ນອັນໜຶ່ງຂອງການກໍ່ສ້າງເຂດເສດຖະກິດໃໝ່ ສີທັນດອນ ເຊິ່ງການກໍ່ສ້າງດັ່ງກ່າວແມ່ນຈະສ້າງໃໝ່ບົນເສັ້ນທາງເດີມທີ່ມີຢູ່ແລ້ວໂດຍຈະເລີ່ມລົງມືຈັດຕັ້ງປະຕິບັດ ພາຍຫຼັງສໍາເລັດພິທີວາງສີລາລືກ ແລະ ຈະໃຫ້ສໍາເລັດໃນປີ 2020 ດ້ວຍມູນຄ່າການລົງທຶນ 25 ລ້ານໂດລາສະຫະລັດ.

ນັບແຕ່ເລີ່ມຕົ້ນກະກຽມໂຄງການກໍ່ສ້າງເສັ້ນທາງດັ່ງກ່າວໃນໄລຍະຜ່ານມາ ໂດຍພາຍໃຕ້ການຊີ້ນໍາໆພາ ແລະ ການຊ່ວຍເຫຼືອສະໜັບສະໜູນຈາກສູນກາງ, ແຂວງ ແລະ ທ້ອງຖິ່ນ ໄດ້ເຮັດໃຫ້ວຽກສໍາຫຼວດ – ອອກແບບອື່ນໆສຳເລັດໄປດ້ວຍດີ ເຊິ່ງການກໍ່ສ້າງດັ່ງກ່າວບໍ່ພຽງແຕ່ເປັນການຂອງຂວັນທີ່ບໍລິສັດມອບໃຫ້ປະຊາຊົນເມືອງໂຂງເທົ່ານັ້ນ ແຕ່ຍັງເປັນຄວາມຮັບຜິດຊອບທາງດ້ານສັງຄົມທີ່ບໍລິສັດຄວນຈະມີສ່ວນຮ່ວມໃນການພັດທະນາທ້ອງຖິ່ນ ແລະ ເປັນການສະແດງໃຫ້ເຫັນເຖິງການຕັດສິນໃຈຂອງພວກຂ້າພະເຈົ້າທີ່ຕ້ອງການພັດທະນາຢ່າງເຕັມກໍາລັງພາຍໃນແຂວງຈໍາປາສັກ ທ່ານກ່າວຢໍ້າ.

ໂອກາດດຽວກັນ, ທ່ານ ປອ. ບຸນຖອງ ດີວິໄຊ ເຈົ້າແຂວງໆຈໍາປາສັກ ກ່າວຕື່ມວ່າ: ການກໍ່ສ້າງເສັ້ນທາງອ້ອມດອນໂຂງແມ່ນໜຶ່ງທີ່ນອນໃນ 17 ກິດຈະກຳໄລຍະທີ 1 ( 2018 – 2025 ) ຂອງໂຄງການພັດທະນາເຂດເສດຖະກິດໃໝ່ ສີທັນດອນ, ເປັນໂຄງການຊ່ວຍເຫຼືອລ້າໃນມູນຄ່າ 25 ລ້ານໂດລາ ເປັນເສັ້ນທາງຄອນກຣີດຍາວ 43 ກິໂລແມັດ ແລະ ຈະໃຫ້ສໍາເລັດໃນປີ 2020 ເຊິ່ງເສັ້ນທາງດັ່ງກ່າວຈະຮອງຮັບແກ່ການຄ້າ, ການຂົນສົ່ງໄປ – ມາ, ການບໍລິການທ່ອງທ່ຽວ ແລະ ເປັນຈຸດດຶງດູດໃຫ້ແຂກມາທ່ຽວໃນດອນໂຂງນີ້ຫຼາຍຂຶ້ນ ທັງເປັນການເຜີຍໂສມໜ້າໃໝ່ຂອງເມືອງໂຂງນຳອີກ.

ຂະນະທີ່, ຜູ້ບໍລິຫານຂອງ ບໍລິສັດ ຮ່ວມພັດທະນາ ສີທັນດອນ ຈຳກັດ ໃຫ້ຮູ້ຕື່ມວ່າ: ດອນໂຂງເປັນດອນທີ່ສວຍງາມ ແລະ ໃຫຍ່ທີ່ສຸດໃນເມືອງໂຂງ ເຊິ່ງບໍລິສັດພວກເຮົາລົງທຶນສ້າງທາງດັ່ງກ່າວຈະເປັນການອໍານວຍຄວາມສະດວກແກ່ການສັນຈອນໄປ – ມາ, ທັງເປັນການສົ່ງເສີມການທ່ອງທ່ຽວ ແລະ ຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນກວ່າເກົ່າ ແລະ ໂຄງການພັດທະນາເຂດເສດຖະກິດໃໝ່ສີທັນດອນຂອງພວກເຮົາມີຄວາມຫວັງອັນແຮງກ້າ ເພື່ອສ້າງໃຫ້ເປັນສູນການຄ້າ, ການທ່ອງທ່ຽວ ແລະ ກາຍເປັນເຂດທີ່ມີຊື່ສຽງໃນພາກພື້ນ ແລະ ສາກົນ ໂດຍນໍາໃຊ້ຊັບພະຍາກອນທຳມະຊາດໃຫ້ເກີດຜົນປະໂຫຍດສູງສຸດໃຫ້ແກ່ປະຊາຊົນທ້ອງຖິ່ນ ພ້ອມທັງເປັນສ່ວນໜຶ່ງໃນການພັດທະນາເສດຖະກິດ – ສັງຄົມຂອງ ສປປ ລາວ ໃນອະນາຄົດ.

ດ້ານ ທ່ານ ສະໜັ່ນ ສີພາພົມມະຈັນ ເຈົ້າເມືອງໆໂຂງ ໃຫ້ສໍາພາດຕື່ມວ່າ: ໂຄງການນີ້ຈະເປັນການຍົກລະດັບເສັ້ນທາງສາຍຫຼັກພາຍໃນດອນໂຂງ ກໍ່ຄືເມືອງໂຂງທີ່ເປັນເສັ້ນທາງປູຢາງຢູ່ແລ້ວໃຫ້ກາຍມາເປັນທາງຄອນກຣີດ ແລະ ຍົກລະດັບເສັ້ນທາງຮ່ອມເຂົ້າໃນແຕ່ລະບ້ານທີ່ເປັນທາງດິນແດງໃຫ້ກາຍເປັນທາງປູຢາງ. ທັງນີ້, ກໍ່ເພື່ອອໍານວຍຄວາມສະດວກແກ່ການສັນຈອນໄປ – ມາຂອງປະຊາຊົນ ແລະ ເຮັດໃຫ້ການທ່ອງທ່ຽວພາຍໃນດອນໂຂງມີຄວາມຄຶກຄັກຍິ່ງຂຶ້ນ ທ່ານເຈົ້າເມືອງກ່າວ.

ໃນຕົ້ນເດືອນຕຸລາຜ່ານມາ, ທີມຂ່າວພວກເຮົາໄດ້ລາຍງານເຖິງຄວາມຄືບໜ້າຂອງໂຄງການພັດທະນາເຂດເສດຖະກິດໃໝ່ສີທັນດອນ ເຊິ່ງຄວາມຄືບໜ້ານັບແຕ່ໄດ້ເຊັນສັນຍາໃນທ້າຍເດືອນມິຖຸນາ 2018 ຜ່ານມາຈົນເຖິງປັດຈຸບັນໄດ້ສໍາເລັດຫຼາຍໜ້າວຽກ ເປັນຕົ້ນແມ່ນ: 1). ສໍາເລັດພິທີເຊັນສັນຍາມອບ – ຮັບຣີສອດ ຄອນພະເພັງ ພ້ອມທັງປັບປຸງຈໍານວນ 25 ຫ້ອງ; 2). ສໍາເລັດການສໍາຫຼວດທີ່ຕັ້ງສໍານັກງານ, ອອກແບບເຮືອນຮັບແຂກ ແລະ ທີ່ຢູ່ອາໄສຂອງພະນັກງານມີທັງໝົດ 200 ຫ້ອງ; 3). ສໍາເລັດການຈົດທະບຽນສ້າງຕັ້ງບໍລິສັດໃນເຂດພັດທະນາຈຳນວນ 6 ບໍລິສັດ; 4). ສໍາເລັດການສໍາຫຼວດ – ອອກແບບທາງອ້ອມດອນໂຂງທີ່ມີຄວາມຍາວ 43 ກິໂລແມັດ ແລະ ທາງລຽບແຄມຂອງຈາກຄອນພະເພັງຫາບ້ານຂີ້ນາກ; 5). ສໍາເລັດການແຕ່ງຕັ້ງຄະນະກໍາມະການຊົດເຊີຍຄ່າເສຍຫາຍ, ຈັດສັນຍົກຍ້າຍທັງລະດັບສູນກາງ ແລະ ທ້ອງຖິ່ນ; 6). ໄດ້ສໍາເລັດການສໍາຫຼວດແຫຼ່ງທ່ອງທ່ຽວທີ່ສໍາຄັນ ໂດຍສະເພາະແມ່ນຄອນພະເພັງ ແລະ ສົມພະມິດ.

ພິທີວາງສີລາລືກໂຄງການຊ່ວຍເຫຼືອລ້າກໍ່ສ້າງເສັ້ນທາງຄອນກຣີດອ້ອມດອນໂຂງ ໄດ້ຈັດຂຶ້ນໃນວັນເສົາທີ 6 ຕຸລາຜ່ານມາ ທີ່ເມືອງໂຂງ ແຂວງຈຳປາສັກ ພາຍໃຕ້ການເປັນປະທານຮ່ວມຕັດແຖບຜ້າຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ເຈິ້ງ ກວາງ ຝ້າຍ ປະທານ ບໍລິສັດ ຮ່ວມພັດທະນາ ສີທັນດອນ ຈຳກັດ, ທ່ານ ບຸນຖອງ ດີວິໄຊ ເຈົ້າ    ແຂວງໆຈຳປາສັກ, ທ່ານ ລາຕີ ສີສຸພັນນະວົງ ຮອງປະທານບໍລິສັດ ພ້ອມດ້ວຍແຂກຖືກເຊີນເຂົ້າຮ່ວມ.

[ ຂ່າວ – ຮູບ: ສົມສະຫວິນ ]

ທີ່ມາ ເສດຖະກິດສັງຄົມ

ທີ່ມາ ຫນັງສືພິມເສດຖະກິດການຄ້າ

ໂຄສະນາ


Like it? Share with your friends!

0
201 shares
admin

0 Comments

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້

This site uses Akismet to reduce spam. Learn how your comment data is processed.

ເລືອກຮູບແບບໂພດສ໌
Story
Formatted Text with Embeds and Visuals
List
The Classic Internet Listicles
Countdown
The Classic Internet Countdowns
Open List
Submit your own item and vote up for the best submission
Ranked List
Upvote or downvote to decide the best list item
Meme
Upload your own images to make custom memes
Video
Youtube, Vimeo or Vine Embeds
Audio
Soundcloud or Mixcloud Embeds
Image
Photo or GIF
Gif
GIF format